AGIZO LA WAZIRI MKUU LATEKELEZWA TARIME

Tuma: February 26th, 2018

Mwenyekiti wa Halmashauri ya Wilaya ya Tarime Mhe. Moses Misiwa amepongeza jitihada zilizofanywa na Mkuu wa Wilaya ya Tarime, Glorious Luoga katika ujenzi wa Kituo cha Afya Nyamwaga na kupatikana kwa vifaa tiba vya kituo hicho.

Kauli hiyo aliitoa mbele ya Naibu Waziri wa Ardhi, Nyumba na Maendeleo ya Makazi, Mhe. Angelina Mabula (Mb) aliposhiriki kwenye tukio la kuanza kwa utoaji huduma wa kituo hicho ambacho Waziri Mkuu, Kassim Majaliwa alitoa agizo la kufunguliwa ifikapo Februari 24 alipokuwa katika ziara Mkoani Mara hivi karibuni.

Alisema, Mkuu wa Wilaya amefanya kazi kubwa mpaka kufikia hatua ya kukamilika kwa Kituo hicho ambacho kwa sasa kipo kwenye mchakato wa kuwa Hospitali ya Wilaya lakini wapo baadhi ya viongozi wa vyama vya siasa wanabeza juhudi za kiongozi huyo jambo ambalo hurudisha nyuma jitihada za viongozi katika kuwaletea wananchi maendeleo.

Aidha , Mwenyekiti alisema kituo kina vifaa tiba vya kisasa ambavyo huwa vinapatikana kwenye Hospitali ya Taifa ya Muhimbili na ni jitihada  za Mkuu wa Wilaya, aliongeza kuwa licha ya kwamba  yeye ni mpinzani lakini kwenye maendeleo lazima apongeze.

Mkuu wa Wilaya ya Tarime alisema wametumia kiasi cha fedha za kitanzania shilingi milioni 300 kununua vifaa mbalimbali vitakavyotumika kwenye Hospitali hiyo na kwamba wananchi wa Nyamwaga na maeneo mengine ya jirani wataondokana na adha ya kwenda mbali kupata huduma.

Akizungumza kwenye hafla hiyo, Naibu Waziri wa Ardhi, Nyumba na Maendeleo ya Makazi, Angelina Mabula alisema anamshukuru Mkuu wa Wilaya kumualika kutembelea kituo hicho na kujionea mambo mazuri ambayo yamefanyika katika kituo hicho wakati akiwa katika ziara ya kikazi Wilayani hapa.

Alisema kutokana na taarifa ya ujenzi wa kituo hicho ameushukuru uongozi wa Mgodi wa Accacia North Mara kwa ujenzi wa kituo hicho cha kisasa na kuahidi  kufikisha taarifa kwa Waziri wa Afya kumuomba kukipa hadhi ya hospitali ya wilaya kwa kuwa kuna kila kitu kinachohitajika.