BARAZA LAPITISHA BAJETI YA SHILINGI BILIONI 43

Tuma: March 12th, 2018

Baraza la Madiwani Halmashauri ya Wilaya ya Tarime limepitisha makadirio ya mpango na bajeti kwa mwaka 2018/2019 kiasi cha shilingi 43,270,776,621.25 ikiwa ni ongezeko la asilimia 18.8 ikilinganishwa na shilingi 36,431,083,427 zilizokisiwa kwa kipindi cha mwaka wa fedha 2017/2018.

Mkurugenzi wa halmashauri ya wilaya ya Tarime Apoo Tindwa alisema kuwa kati ya fedha hizo Tshs. 922,399,999.8 ambazo ni fedha za ruzuku kutoka serikali kuu zitatumika kutekeleza miradi ya maendeleo, tshs 526,789,083 ni fedha za ruzuku zitakazotumika kwa matumizi ya kawaida, tshs. 2,440,000,000 ni fedha zitakazotumika kutekeleza miradi ya maendeleo kutokana na mapato ya ndani (co-funding), Tshs 31,801,968,000 zitatumika kulipa mishahara, Tshs 2,817,067,975 ni matumizi ya kawaida ya makusanyo ya ndani ya Halmashauri na shilingi 4,762,551,563.27 ni mapato yanayotokana na vyanzo vingine kama vile Mfuko wa pamoja wa Afya, Mfuko wa Jimbo,Mradi wa Maji, usafi na mazingira, mpango wa kuboresha elimu ya sekondari na Mradi wa kuboresha elimu ya Msingi.

Maeneo yaliyopewa kipaumbele katika mpango huu ni kuimarisha ukusanyaji wa mapato ya ndani ya Halmashauri, kuboresha miundombinu ya Elimu msingi na Sekondari ,Ujenzi wa nyumba za walimu,kuongeza kiwango cha upatikanaji wa dawa kutoka 87% hadi 95% kufikia juni 2019 na kuongeza miundombinu kwenye vituo vya kutolea huduma ya afya.

"Kuongeza miundombinu ya maji,barabara mpya ili kurahisisha usafirishaji wa mazao kutoka shambani ,kuinua sekta ya kiuchumi,kutatua migogoro ya ardhi na kulipa madeni watumishi wa kada mbalimbali" alisema Tindwa.

Diwani wa kata ya Ganyange Nashoni Marwa aliitaka Serikali kutoa fedha kwa wakati kwani inapochelewesha fedha miradi ya maendeleo haitekelezwi kwa wakati.