HALMASHAURI YA WILAYA TARIME YANUFAIKA NA MAFUNZO YA FFARS

Tuma: July 11th, 2017

Ofisi ya Rais- TAMISEMI kwa kushirikiana na Mradi wa Uimarishaji wa Mifumo ya Sekta za Umma (Public Sector System Strengthening PS3) wametoa mafunzo ya Mfumo wa Uhasibu na utoaji Taarifa za fedha kwa ngazi ya Kituo cha kutolea huduma ujulikanao kwa lugha ya kigeni kama (FFARS- Facility Financing Accounting and Reporting System) kwa Wakuu wa vituo vya Afya na Maafisa Elimu Kata katika Ukumbi wa Blue Sky Mjini Tarime tarehe 12.06.2017.

Akifungua Mafunzo hayo Kaimu Mkurugenzi wa Halmashauri ya Wilaya Tarime Dkt. Peter Nyanja amewasihi washiriki wa mafunzo kuzingatia kwa umakini kile ambacho wanafundishwa kwani baada ya mafunzo hayo watakwenda kufundisha Watumishi wa ngazi za chini za Mamlaka ya Serikali za Mitaa kwenye vituo vyao vya kutolea huduma zikiwemo Zahanati na Shule.

Bw. Geoffrey G. Lufumbi ambaye ni Mshauri wa masuala ya Rasilimali Watu PS3 amewataka washiriki wa mafunzo kuhakikisha taarifa za fedha zinaandaliwa kwa usahihi na kutumwa kwa wakati Makao Makuu ya Wilaya kwa kila mwezi na kwa kila robo mwaka.

Kwa kuhitimisha Mhasibu wa Idara ya Afya Bw. Elizeus Rwilanga ameipongeza PS3 kwa kuandaa mafunzo hayo na kwamba yatarahisisha uandaaji wa taarifa za fedha kwa ufanisi na haraka.