HALMASHAURI YA WILAYA YA TARIME YAPATA HATI SAFI.

Tuma: August 2nd, 2017

Halmasahuri ya Wilaya ya Tarime imetunukiwa hati safi baada ya kufanyiwa ukaguzi na mdhibiti wa hesabu za Serikali (CAG) kwa kipindi cha mwaka wa fedha 2015/2016.

Kwa niaba ya Mdhibiti na Mkaguzi Mkuu wa Hesabu za Serikali Bw.Pastory        Massawe ambaye ni Mkaguzi wa nje wa hesabu za Serikali Mkoa wa Mara alisema kwamba Halmashauri ya wilaya ya Tarime imepata hati hiyo baada ya kukidhi vigezo vya ukaguzi katika maeneo ya Miradi ya Maendeleo ikiwemo, Mfuko wa pamoja (Basket Fund), TASAF, Mfuko wa barabara (Road Fund), miradi ya Maji pamoja na matumizi ya uendeshaji. 

Massawe alisema hayo mbele ya baraza la Madiwani la Halmashauri ya Wilaya wakati wa kuwasilisha taarifa ya mkaguzi wa hesabu za Serikali.

Mkurugenzi wa Halmashauri ya Wilaya ya Tarime Bw. Apoo Tindwa  alisema amepata ushirikiano mkubwa kutoka baraza la Madiwani kwa kufanya kazi kwa pamoja na weledi mkubwa hadi kufikia hatua hiyo ya kupata hati safi, na kuwaomba washirikiane zaidi katika kubaini vyanzo vipya vya mapato katika maeneo yao ili kuongeza mapato ya ndani ya Halmashauri.

Kwa upande wake Katibu Tawala Wilaya Bw. John Marwa aliwahakikishia Madiwani kuendelea kusimamia amani Wilayani kwani kwenye amani ndipo kunapopatikana maendeleo.

“Tutahakikisha kuwa amani inaimarika ili Wananchi wetu waendelee kuishi kwa amani na hatutaruhusu mtu yeyote avuruge amani iliyopo kwa kuwa ataharibu mipango ya maendeleo yetu kwa wananchi” alisema Marwa

Akifunga kikao Mwenyekiti wa Halmashauri ya Wilaya Tarime Mhe. Moses Misiwa alisema wapo baadhi ya madiwani ambao wanatumia maneno ya kichochezi ambayo huhatarisha usalama wa Wananchi wao na kuharibu taswira ya Wilaya jambo ambalo amesema hatalikubali.

….MWISHO….