IDARA YA ARDHI YASISITIZWA KUTUMIA MFUMO WA UKUSANYAJI KODI

Tuma: March 12th, 2018

Naibu Waziri wa ardhi nyumba na Maendeleo ya Makazi Angelina Mabula ameiagiza halmashauri ya wilaya ya Tarime kuwafatilia wadaiwa sugu wa kodi za Ardhi zaidi ya Bilioni 3, na kwa wale watakaokaidi agizo hilo mali zao ziuzwe kulingana na thamani ya pesa wanayodaiwa.

Hayo aliyasema wakati wa Ziara yake Tarime ya kukagua mfumo wa ukusanyaji kodi za ardhi, na kuangalia hatua mbalimbali zinazochukuliwa na Halmashauri katika ukusanyaji wa kodi ya ardhi ikizingatiwa kuna idadi kubwa ya wadaiwa sugu ndani ya Wilaya, pia hatua mbalimbali zinazochukuliwa na Halmashauri katika kushughulikia migogoro ya mipaka.

Mabula aliwataja baadhi ya wadaiwa sugu wa kodi za ardhi wanaodaiwa tangu 1999 akiwemo Mzee Magarya Mwita ambaye anadaiwa zaidi ya shilingi milioni 80.

“Kanisa la Anglican milioni zaidi ya 478, Mara Cooparative milioni 205, MC Chambili milioni 58, Wilson Tanzania Limited milioni 28 ,Willison Kiguha milioni 19, Sylvesta Nyamuhanga milioni 17, Tarime English Medium milioni 4 na Tarime wood and Treatement milioni 6.’’

Aliongeza “hawa ni baadhi nimewataja kwa majina makusudi ili muwafahamu, Maafisa ardhi wafuatilieni watu hawa, serikali imewarahisishia kazi mnaingia kwenye mfumo na orodha yote mnaipata”.

Wakieleza changamoto mbalimbali zinazokabili Idara ya Ardhi, Kaimu Afisa Ardhi Halmashauri ya wilaya ya Tarime Rhoida Nyondo alisema migogoro mingi inashindwa kutatuliwa kutokana na wananchi kutokubaliana na ramani za Serikali na kutaka mipaka ya koo itambulike.

Mwenyekiti wa halmashauri ya wilaya ya Tarime Moses Misiwa alimtaka Waziri huyo kuingilia kati mgogoro wa ardhi kijiji cha Gibaso na mwekezaji Isaack and Son anayedaiwa kuchukua eneo kinyume cha sheria ambapo Waziri aliagiza yafanyike marekebisho ya hati ya umiliki.

Waziri huyo aliwataka watumishi wa idara ya ardhi siku tatu katika wiki waende vijijini kutatua kero za wananchi, na kusisitiza suala la upimaji maeneo yote ya taasisi za umma ili kuepuka uvamizi.

,,,,,,,,,,,,,,,,,,,,,,,,,,,,,,,,,,,,,,,,,,,,,,,,,Mwisho,,,,,,,,,,,,,,,,,,,,,,,,,,,,,,,,,,,,,