JUKWAA LA WANAWAKE LAZINDULIWA TARIME.

Tuma: July 18th, 2017

Wanawake Wilayani Tarime wametakiwa kuondokana na dhana kuwa mwanamke anaweza akiwezeshwa kwani kauli hiyo huwafanya baadhi ya wanawake kushindwa kufanya shughuli mbalimali za maendeleo kwa imani kuwa bila kusaidiwa hawawezi kufanya kazi.

Hayo yalielezwa na Katibu Tawala wa Wilaya ya Tarime Bw. John Marwa kwenye kikao cha uchaguzi wa viongozi wa Jukwaa la Wanawake Halmashauri ya Wilaya Tarime.

Marwa alisema kuwa wanawake wa Tarime ni wachapakazi wa maendeleo katika shughuli za ujasiliamali zikiwemo biashara za ndizi mbivu, viazi kwa kutumia mitaji yao wenyewe.

“Wanawake wanaweza hata bila kuwezeshwa ukiangalia hapa Tarime uchumi mkubwa unachangiwa na wanawake hususani biashara za ujasiliamali, katika soko la Rebu wanawake wanafanya biashara hivyo nawaomba wanawake Jukwaa hili linaloundwa liwe chachu katika shughuli za uzalishaji” alisema Katibu Tawala.

 Nae Afisa Maendeleo ya Jamii wa Halmashauri ya Wilaya Tarime Bw. Victor Kabuje alisema malengo ya jukwaa hilo ni kuwakutanisha wanawake ili kujadili fursa, changamoto na jinsi ya kushiriki kikamilifu katika biashara na shughuli zingine za maendeleo.

“Lengo lingine ni kuongeza uelewa wa wanawake katika biashara, upatikanaji wa mitaji, sheria za nchi katika masuala ya uchumi na jinsi ya kujitegemea kiuchumi” alisema Kabuje.

Katibu wa Chama cha Wafanyabiashara Wanawake Mkoa wa Mara Bi. Noela Gachuma alisema sasa ni wakati wa wanawake kujikuza kibiashara kusaidia masuala ya uhabarishaji wa maeneo ambayo yanasaidia kuboresha biashara na shughuli za kiuchumi.

Katika kikao hicho wanawake walifanya uchaguzi wa viongozi wa Jukwaa la Wanawake, nafasi ya Mwenyekiti ilinyakuliwa na Bi. Mariam Mkono ambaye ni Diwani viti maalum kata ya Nyamwaga (CCM), Makamu Mwenyekiti Bi. Veronica Merengo na Katibu Bi. Mary Ntarisa wakiwa ni Watumishi wa Halmashauri ya Wilaya Tarime.

Imetolewa na:

Kitengo cha Habari na Uhusiano

Halmashauri ya Wilaya ya Tarime

18 Julai 2017.