KATIBU TAWALA TARIME AZINDUA CHANJO YA MINYOO NA KICHOCHO.

Tuma: July 19th, 2017

Katibu Tawala wa Wilaya ya Tarime Bw. John Marwa amesema ili mtoto  asome vizuri anahitaji kupata afya njema ikiwa ni pamoja na kupata chanjo ya minyoo, kichocho na magonjwa mengineyo.

Marwa ambaye alikuwa Mgeni rasmi kwenye uzinduzi wa zoezi la chanjo ya Minyoo na Kichocho lililofanyika Kiwilaya katika Shule ya Msingi Nyamwaga ambapo aliambatana na Mwenyekiti wa Halmashauri ya Wilaya ya Tarime  Mhe. Moses Misiwa, Mkurugenzi wa Halmashauri ya Wilaya Bw. Apoo Castro Tindwa na Mganga Mkuu wa Wilaya Dkt. Boniventure Bisulu.

                                                                                                                                                                                                                                                                                                                                                                                                                                                                  Amesema Serikali kwa kushirikiana na Shirika la Afya Duniani imetoa chanjo hiyo bure bila malipo yoyote na kwamba dawa hizo hazina madhara yoyote kwa matumizi ya binadamu. Hivyo wazazi waachane na dhana potofu ya kwamba watoto watazimia pindi wakitumia dawa.

Mwenyekiti wa Halmashauri alisisitiza suala  zima la kuzingatia sheria ya mtoto na kwamba kila mzazi anawajibu  wa kulinda afya ya mtoto na kuhakikisha mtoto anakuwa salama wakati wote.

Aliongeza kwa kuipongeza Serikali kwa kutoa chanjo hizo kwa watoto kwani itawakinga na magonjwa yanayoweza kuwasababishia kuwa na afya dhoofu.

Bw. Apoo aliishukuru pia serikali kwa kutoa chanjo na kuwasisitiza wazazi na watoto kuzingatia usafi wa mwili kwa ujumla. Alisema ili kujikinga na magonjwa ya minyoo ni muhimu kuzingatia usafi wa mazingira yanayotuzunguka na kutumia vyoo, pia kujenga desturi ya kupima afya zetu mara kwa mara ili kuepukana na magonjwa ya milipuko.

Nae Mganga Mkuu wa Wilaya Dkt. Boniventure Bisulu alifafanua kwamba Tanzania imeungana na Nchi nyingine katika kupiga vita Magonjwa yaliyosahaulika kama vile Kichocho na Minyoo na kwamba mpaka sasa inakadiriwa watu bilioni 2 wameathirika na Ugonjwa wa Kichocho.

Halmashari ya Wilaya Tarime inategemea kutoa chanjo kwa watoto 99,000 walio na umri kuanzia miaka 5 hadi 15.

 Imetolewa na:

Kitengo cha Habari na Uhusiano

Halmashauri ya Wilaya ya Tarime

19 Julai 2017.