KIKAO KAZI CHA USIMAMIZI BORA WA MIRADI YA MAENDELEO

Tuma: October 20th, 2021

Mheshimiwa Col. Michael Mangwela Mntenjele Mkuu wa Wilaya ya Tarime katika kikao kazi kilichojumuisha Wakuu wa Idara, Waratibu elimu kata, walimu wakuu, wakuu wa shule na waganga wafawidhi wa vituo vya afya  kilichofanyika tarehe 20/10/2021 katika ukumbi wa shule ya sekondari JK Nyerere Nyamwaga kwa ajili ya kutoa maelekezo juu ya usimamizi wa miradi mipya ya maendeleo katika Halmashauri ya wilaya ya Tarime itakayotekelezwa kwa fedha za mapambano dhidi ya uviko 19 takribani shilingi bilioni 2.54 na tozo za miamala ya simu kiasi cha shilingi milioni 300.

Mkuu wa wilaya aliwaasa na kuwataka Watumishi katika ngazi zote kusimamia miradi hiyo kwa umakini, uadilifu, ubora na uaminifu na kwamba mfumo utakaotumika kutekeleza ni ule wa “force account”. Pia aliwataka watumishi wasimamie miradi kwa kufuata sheria na miongozo ya serikali bila kurubuniwa na mtu yeyote, na kwamba atakaekiuka utaratibu hatua kali za kisheria zitachukuliwa dhidi yake.

Aidha alikijulisha kikao kuwa tayari orodha ya vifaa hitajika na gharama za ufundi zimekwisha kutolewa kwa kila aina ya jengo na kusambazwa Tanzania nzima (schedule of materials). Hata hivyo alisema, suala la bei ya vifaa lazima kuzingatia bei ya soko na fedha zilizotolewa si kwa ajili ya kulipa posho, na kwamba kazi zote ziendane na muda uliopangwa huku ikizingatiwa thamani ya fedha (value for money).

Katika kikao hicho Mkurugenzi Mtendaji wa Halmashauri ya Wilaya ya Tarime Ndugu Solomoni I. Shati alitoa utangulizi wa maelekezo ya namna  bora ya usimamizi wa miradi ya maendeleo kwa watumishi wa kada ya Elimu na Afya. Mkurugenzi pia alimshukuru Mhe Samia Suluhu Hassan Rais wa Jamhuri ya Muungano wa Tanzania kwa kutupatia fedha kiasi cha shilingi bilioni 2.84 kwa ajili ya utekelezaji wa miradi ya maendeleo kwa wananchi na Halmashauri kwa ujumla.

Aidha Mkurugenzi Mtendaji amemhakikishia Mkuu wa Wilaya kuwa fedha zote zilizotolewa zitasimamiwa kuhakikisha zinatumika ipasavyo, kwani tayari zimeshaundwa kamati za usimamizi kutoka ngazi ya kijiji hadi Mkoa na kwamba kama Wilaya tutatoa ushirikiano wa kiutendaji kwa kamati zote ili kufikia malengo pangwa.Akitaja kamati ya wilaya ya usimamizi miradi ya maendeleo inayoundwa na:-

Mhe Mkuu wa Wilaya……Mwenyekiti

 Mkurugenzi Mtendaji……Katibu

Mwenyekiti wa Halmashauri ya Wilaya……Mjumbe

Afisa Usalama wa Wilaya (DSO)……Mjumbe

Afisa wa TAKUKURU Wilaya……Mjumbe

Mhandisi Ujenzi Wilaya……Mjumbe

Wakuu wa Idara na watumishi wa kada ya Elimu na Afya ambao ni maafisa elimu kata, wakuu wa shule, walimu wakuu na wasimamizi wa vituo vya kutolea huduma za afya, wakipokea maelekezo ya usimamizi bora wa miradi mipya ya maendeleo.