MAKUBALIANO YA UJENZI WA KIWANDA CHA SUKARI WILAYANI TARIME YASAINIWA

Tuma: April 10th, 2017

Halmashauri ya Wilaya Tarime imesaini mkataba wa makubaliano (MoU) na Kampuni ya Nile Agro Industries Limited ya Nchini Uganda.

Hafla ya kusaini makubaliano hayo imefanyika katika ukumbi wa uwekezaji katika ofisi ya Mkuu wa Mkoa wa Mara na kushuhudiwa na Viongozi mbalimbali wa Mkoa na Wilaya, akiwemo Mkuu wa Mkoa wa Mara Dkt Charles Mlingwa, Katibu Tawala  wa Mkoa Mara Bw. Adoh S. Mapunda, Mkuu wa Wilaya Tarime Bw. Glorious Luoga na Katibu Tawala Wilaya Bw. John Marwa, viongozi mbalimbali wa Kata na Vijiji wanaotegemea kunufaika na uwekezaji huo, wafanyabiashara na Wakandarasi wa Wilaya ya Tarime.

Mkuu wa Wilaya ya Tarime amesema ujenzi wa kiwanda hicho utatoa ajira (direct employment 5000 na indirect employment kwa watu 1000, vilevile kusaidia Wakulima kuanzisha kilimo cha miwa kama zao lao la biashara.

Ameongeza kwamba uwekezaji huo utaiwezesha Halmashauri ya Wilaya ya Tarime kuongeza mapato yake ya ndani kupitia ushuru wa huduma.

 “Hadi sasa kuna eneo lenye ukubwa wa hekta 4439 limeandaliwa kwa ajili ya Muekezaji na hekta zingine 1,297 zimeandaliwa kwa ajili ya Wakulima wadogowadogo kulima Miwa”amesema Mkuu wa Wilaya.

Kwa upande wake Mkuu wa Mkoa wa Mara Dkt. Charles Mlingwa amempongeza Mkuu wa Wilaya ya Tarime kwa juhudi ambazo amefanya hadi kufikia hatua ya kuanzisha kilimo cha Miwa na Ujenzi wa kiwanda cha sukari. Dkt, Mlingwa ameahidi kutoa ushirikiano wa kutosha kwa wawekezaji.

 Mwenyekiti wa Halmashauri ya Wilaya ya Tarime Moses Misiwa baada ya kusaini mkataba huo amesema ujio wa Mwekezaji ni neema kubwa kwa wana Tarime na kusema kuwa Halmashauri imejipanga vizuri kuhakikisha uwekezaji huo unakuwa na mafanikio makubwa.

Mkurugenzi Mtendaji wa Kampuni ya Nile Agro Industries Limited Bw. Patel Gajendra amemalizia kwa kusema wako tayari kuanza Ujenzi huo mapema iwezekanavyo.