MKURUGENZI MTENDAJI ATETA NA WATUMISHI WAKE.

Tuma: July 17th, 2017

Mkurugenzi Mtendaji wa Halmashauri ya Wilaya ya Tarime Bw. Apoo Castro Tindwa amewaagiza Watumishi kufanya kazi kwa kuzingatia Miongozo ya sheria, kanuni na taratibu za Utumishi wa Umma.

Akizungumza na watumishi wa Halmashauri ya Wilaya ya Tarime wakati wa kilele cha maadhimisho ya wiki ya Utumishi wa Umma katika kikao kilichofanyika kwenye Ukumbi wa Mikutano wa Halmashauri aliwasihi watumishi kufanya kazi kwa kufuata sheria na taratibu za kazi zao ikiwa ni pamoja na kuwa na nidhamu katika kuhudumia Wateja, kufika kazini kwa wakati uliopangwa kisheria na kutekeleza majukumu yao yote kwa uadilifu.

Aliongeza kwamba Watumishi wote wanapaswa kuvaa vitambulisho vya kazi muda wote wanapokuwa kazini na kuzingatia mavazi ya heshima yanayoendana na muongozo wa mavazi  ya watumishi uliopo.  Aidha aliwasisitiza Wakuu wa idara kuhakikisha vikao vya idara vya kila mwezi vinafanyika na mihtasari ya vikao kuwasilishwa kwake kila mwezi.

 Hata hivyo amewasihi watumishi kuwa wavumilivu wakati serikali ikishughulikia suala la upandishaji vyeo na ulipaji wa madeni yao na wakati ukifika wote watalipwa hivyo kwasasa wafanye kazi kwa bidii kwa lengo la kuboresha huduma kwa Wananchi wa Tarime.

Afisa Utumishi wa Wilaya Bw. Kelvin Mkirya aliwakumbusha Watendaji wa Kata na Vijiji kufanya vikao vya kisheria kwa wakati na kuhamasisha Wananchi kuchangia katika shughuli za maendeleo.

Akichangia hoja Afisa Mtendaji wa Kijiji Bi. Magreth Paulo alisisitiza suala la nidhamu katika mavazi na kushauri kuwepo na sare katika mavazi kwa Watumishi wote wa Halmashauri ya  Wilaya ya Tarime.

Wiki ya Utumishi wa Umma huadhimishwa kila mwaka kuanzia Juni 16 hadi Juni 23.

Imetolewa na:

Kitengo cha Habari na Uhusiano

Halmashauri ya Wilaya ya Tarime

17 Julai 2017.