MKUU WA MKOA MARA APIGA MARUFUKU UUZWAJI WA NAFAKA NJE YA NCHI

Tuma: July 14th, 2017

Na. Shomari Binda, Mtanzania Tarime.

Mkuu wa Mkoa wa Mara Dkt. Charles Mlingwa, amepiga marufuku usafirishaji wa Nafaka hususani Mahindi nje ya Nchi kupitia mpaka wa Sirari kwa lengo la kukabiliana na tatizo la uhaba wa Chakula ambalo limekuwa likijitokeza.

Alitoa kauli hiyo alipokuwa akizungumza na Watumishi wa idara mbalimbali wanaofanya kazi katika  Kituo cha Forodha Mpaka wa Sirari.

Mkuu wa Mkoa aliwataka kufanya kazi kwa ushirikiano kuhakikisha maagizo hayo yanafanyiwa kazi kwa kudhibiti chakula kwenda nje ya Nchi. Alisema Serikali imekwisha kutoa maagizo juu ya suala hilo na yeye amesisitiza, kwasababu Mpaka huo umekuwa ukitumika kupitisha Mahindi na Nafaka nyingine kwenda nje.

Dkt. Mlingwa alisisitiza haiwezi kukubalika Watanzania wakalima chakula na kisha kukipeleka nje ya Nchi na baadaye kuanza kulalamika uhaba wa chakula, kwamba jambo hilo linapaswa kudhibitiwa hususani kwenye maeneo ya Mipakani.

Aliongeza kwamba wapo Wafanyabiashara ambao wakati maagizo ya Serikali yanapotolewa hushindwa kuyatii, na kuwatahadharisha wasijaribu kufanya hivyo Mkoani Mara kwa kuwa mali zao zitataifishwa pale watakapojaribu kupitisha Nafaka katika Mpaka wa Sirari.

Aliwaagiza Viongozi wa Halmashauri ya Wilaya ya Tarime kuweka kituo cha ukaguzi katika eneo la Komaswa kabla ya kufika kwenye mpaka wa Sirari.

Meneja wa Mamlaka ya Mapato (TRA) Bw. E. Nkangaza alisema hadi sasa wametaifisha gari moja, Pikipiki 24 na baiskeli 12 ambazo zilikuwa zikisafirisha Mahindi kwenda nje ya Nchi kupitia mpaka wa Sirari.