SERIKALI YAAGIZA KUANZISHWA KWA MADAWATI YA ULINZI WA MTOTO.

Tuma: October 13th, 2017

Na. Samson Chacha Habari leo Tarime.

Serikali imeagiza shule zote za sekondari na msingi, kuanzisha madawati ya ulinzi na usalama wa mtoto katika shule zao ndani ya miezi sita kuanzia sasa ili mtoto akipata shida ajue atakakokwenda kutoa taarifa.

Aidha imezindua kampeni kwa mikoa 10 ya Tanzania Bara, ambayo itahakikisha inatokomeza mimba za utotoni ikihamasisha Watoto wa kike kujilinda, kujithamini na kujipenda ili kufikia matarajio yao.

Waziri wa Afya, Maendeleo ya Jamii, Jinsia, Wazee na Watoto Mhe. Ummy Mwalimu alisema hayo hapa Wilayani Tarime katika kilele cha maadhimisho ya siku ya mtoto wa kike duniani.

Katika maadhimisho hayo, wadau mbalimbali wameshiriki katika maandalizi ya siku hiyo ikiwemo Plan International ambapo kauli mbiu ya siku ya mtoto wa kike duniani ni “Tokomeza mimba za utotoni kufikia uchumi wa viwanda”.

Ummy aliagiza kuwa ni lazima shule zote za msingi kuanzisha madawati hayo ya ulinzi na usalama wa mtoto ili mtoto ajue akipata tatizo la ukatili ikiwemo ubakaji, ukeketaji ajue atakimbilia kwa mwalimu yupi au ofisi gani ili atoe taarifa na kupata msaada. Alisema mbali na kuanzishwa madawati hayo pia walimu wakuu wachague mwalimu mmoja au wawili ambao watahakikisha kuhusika katika dawati hilo.

Kuhusu kampeni alisema serikali imezindua kwa mikoa 10 nchini ili kutokomeza mimba za utotoni ambayo itawezesha watoto wa kike kujitambua thamani waliyonayo.

Aliongeza kwa kusema, kwa mujibu wa takwimu za Benki ya Dunia zinaeleza kuwa endapo wasichana wakiwezeshwa wanaweza kuchangia katika uchumi kwa asilimia 15 wakati upande wa wanaume ni kwa asilimia 11.

Alisema kampeni ni endelevu ikigusa mikoa hiyo kwa Tanzania Bara ili mtoto wa kike asome kwa bidii huku akisisitiza kuwa serikali ina mpango pia wa kufanya utafiti ili kuwatambua mafataki wanaoharibu malengo ya mtoto wa kike na kuwachukulia hatua.

Aidha alisema mimba za utotoni zina athari kubwa, ambapo asilimia 15 ya vifo vya uzazi vinatokana na watoto kupata ujauzito katika umri mdogo ambapo vifo hutokea kwa wenye umri kati ya miaka 15 hadi 18.

Awali akizungumza, Mwakilishi Mkazi wa Shirika la Kimataifa la watoto Duniani (UNICEF) Maniza Zaman alisema bado tuna kazi ya kufanya katika kuhakikisha mtoto wa kike aliye katika umri wa balehe anavuka kipindi hicho kwa usalama ili kufikia utu uzima. Na kuongeza kuwa ipo haja ya kulelewa kwa watoto wa kike na kiume tofauti na ilivyozoeleka awali.