TANZANIA NA KENYA WAUNGANA KUHAKIKI MIPAKA YA KIMATAIFA

Tuma: March 27th, 2018

Tanzania na Kenya wameanza uhakiki wa mipaka ya Kimataifa iliyowekwa na Wakoloni ikiwa ni utekelezaji wa agizo la Umoja wa nchi za Afrika(AU) iliyozitaka nchi hizo kupitia na kufanya maboresho ya mipaka ili kuepuka migogoro ya mipaka baina ya nchi na nchi.

Mjadala huo ulifanyika kwenye kikao kilichofanyika wilayani Tarime nchini Tanzania ukijumuisha wataalamu mbalimbali wa Ardhi Kutoka Wizara ya Ardhi Nyumba na Maendeleo ya Makazi Tanzania, Wizara ya Ardhi nchini Kenya,Watafiti ,Wapimaji ramani kutoka Wilaya za Tanzania na Majimbo(Kaunt) ya Kenya yanayopakana na nchi hizo.

Mkurugenzi Msaidizi maswala ya Upimaji Vijijini kutoka Wizara ya Ardhi Nyumba na Maendeleo ya makazi Huruma Lugala alisema lengo ni kuweka na kuimarisha alama ili ionekane kwa urahisi ambapo alama za mwanzo ziliwekwa na wakokoni na baadhi zimechakaa na kuharibika.

Lugala alisema kuwa urefu wa mpaka ni kilomita 760 nakwamba kilomita 238 zaitahakikiwa katika awamu ya kwanza ikihusisha mikoa miwili ya Mara na Arusha ambapo wameanzia Ziwa Victoria upande wa Shirati wilayani Rorya hadi Mkoani Arusha na wamegawanyika kwa makundi zoezi litakalochukuwa muda wa miezi mitatu.

“Mipaka iliwekwa na wakoloni wakati huo kulikuwa ni mapori sasa watu wanaongezeka, tunaimarisha mipaka na kuweka alama, lengo ni kuepusha migogoro kati ya nchi na nchi na ifikapo mwaka 2022 zoezi linatakiwa liwe limekamilika.” alisema.

Mtaalamu wa Upimaji Mipaka ya Kimataifa Raymond Bagenda alisema zoezi la uhakiki wa mipaka lina wiki moja tangu kuanza na linaendelea kwa kutoa elimu juu ya umuhimu wa zoezi hilo kwa viongozi wa ngazi zote katika maeneo husika.

George Natembea kutoka Akaunt ya Narock-Kenya alisema kuwa ni vema kila Taifa kujua mipaka yake hivyo mipaka ya Kimataifa inapaswa kulindwa na kutunzwa ili isiharibike na kwamba mipaka ya Tanzania na Kenya Inafahamika hivyo hakuna ugumu katika uhakiki wa mipaka hiyo.

            ,,,,,,,,,,,,,,,,,,,,,,,,,,,,,,,,,,,,,,,,,,,,,,Mwisho,,,,,,,,,,,,,,,,,,,,,,,,,,,,,,,,,,,,,