TARIME YAJIPANGA KUMALIZA MIGOGORO YA ARDHI.

Tuma: January 5th, 2018

Halmashauri ya Wilaya ya Tarime imejipanga kumaliza migogoro ya ardhi licha ya Wananchi kung’ang’ania mipaka ya asili ambayo mwanzoni ilikuwa imeungana na Wilaya ya Rorya, hivyo kukuza migogoro.

Akitoa taarifa kwenye kikao cha Baraza la Madiwani Mkurugenzi Mtendaji Apoo Tindwa, alisema kutokana na kugawanywa kwa Halmashauri ya Tarime na kuzaliwa ile ya Rorya na tena kutenganisha Halmashauri ya Mji na Vijijini kulikuwa na mabadiliko ya mipaka.

Alisema ni muhimu wananchi wakakubaliana na mabadiliko hayo na kuachana na mipaka ya asili ambayo wamekuwa wakiing’ang’ania kutokana na sababu za kimaisha, ikiwa ni pamoja na koo zao kuendelea kujirithisha mipaka hiyo hivyo kuendelea kwa migogoro ya ardhi. Apoo alisema mipaka hiyo ya asili imehama kutokana na mgawanyo wa kiutawala lakini wataendelea kutoa elimu ili waweze kuelewa  na kumaliza migogoro ambayo imekuwa ikijitokeza na wananchi kuendelea na shughuli za kiuchumi.    “Tumejipanga kumaliza migogoro hii licha ya kuwepo kwa changamoto mbalimbali ikiwemo tofauti baina ya koo”, alisema Apoo

Diwani wa Kata ya Kemambo, Mhe. Bogomba Rashid alisema anapendekeza kuundwa kwa kamati ambayo itatatua migogoro ya ardhi kwenye wilaya hiyo na kumaliza mambo ya mipaka ya koo na kufanya kazi kwa pamoja.

Alisema haiwezekani kuendelea kuwa na mambo ya kugombana koo na koo jambo ambalo linachelewesha maendeleo na kutaka jambo hilo lifanyike mapema ili wananchi waweze kufikia malengo yao ya kujiinua kiuchumi.