WALENGWA WAHIMIZWA KUZINGATIA MASHARTI YA FEDHA ZA TASAF TARIME

Tuma: February 22nd, 2018

WALENGWA WAHIMIZWA KUZINGATIA MASHARTI YA FEDHA ZA TASAF TARIME

Wanufaika wa mradi wa mfuko wa Maendeleo ya Jamii TASAF wilayani Tarime wametakiwa kuzingatia masharti ya fedha za kaya masikini zinazotolewa na Serikali ili ziwanufaishe na kupata maendeleo.

Akizungumza na Afisa habari wa Halmashauri ya wilaya ya Tarime, Mratibu wa TASAF wilayani humo Emmanuel Kadama amesema kuna baadhi ya wanufaika wachache huwa hawajitokezi kuchukua malipo yao na wala hawatoi taarifa na kwamba mtu anaposhindwa kuchukua fedha kwa awamu mbili mfululizo wanaondolewa katika mpango na mfumo wa TASAF.

Mmoja kati ya wanufaika Ghati Nyamohanga ambaye ni Mjane kutoka kijiji cha Nyakunguru ameishukuru Serikali kwa kuwawezesha fedha kaya masikini ambazo zimewafikia na watu wa vijijini na zimewasaidia katika mahitaji ya shule, matumizi ya Nyumbani na Afya.

Aliongeza kuwa Fedha hizo zimemwezesha kujenga nyumba ya kuishi na kuanzisha biashara ndogondogo na wanafunzi kupata sare za shule na matibabu na kwamba zoezi hilo la kuwanufaisha masikini liwe endelevu.

Kadama alisema kuwa wamepokea fedha milioni 221,158,160 kwa ajili ya malipo kwa kaya 5,530 katika Vijiji 44 na mitaa 22 ambayo ni malipo ya 16 ya mwezi January na February 2018.

Wanufaika wa mradi wa mfuko wa Maendeleo ya Jamii TASAF katika Kijiji cha Nyakunguru wakisubiri kupokea Malipo yao.