WANANCHI KATA YA NYAMWAGA WAPATA ELIMU YA KINYWA NA MENO

Tuma: March 20th, 2018

Wananchi 245 Kata ya Nyamwaga wilayani Tarime mkoani Mara wameng’olewa meno kutokana na matatizo ya meno huku Wanafunzi 510 kutoka shule 10 za msingi wakipata Elimu ya Afya ya Kinywa na Meno.

Zoezi hilo limeendeshwa na timu ya Madaktari 21 wa Kinywa na Meno kati ya hao 15 wametoka Dar es Salaam na 6 kutoka mikoa ya Kanda ya Ziwa, ikiwa ni sehemu ya maadhimisho ya siku ya kinywa na meno duniani.

Daktari wa Kinywa na meno mkoa wa Mara Dkt Nila Jackson  alisema kuwa Madaktari hao wamegawanyika kimakundi kutoa elimu ya Kinywa na meno mashuleni na katika Vituo vya kutolea huduma ya Afya lengo likiwa ni kuhakikisha wananchi wanafahamu namna ya kujikinga pamoja na kuzingatia usafi wa meno.

Wakitoa elimu kwa Wanafunzi wa Darasa la Tatu shule ya msingi Maika Kata ya Nyamwaga Daktari wa Kinywa na Meno kutoka Hospitali ya wilaya ya Ngara mkoani Kagera Dk.David Mapunda aliwataka wanafunzi kutotumia vitu vya sukari kama,Sukari Pipi,Chocolate,Soda kwakuwa vinachangia kuoza na kutoboka kwa meno.

Joseph Kazimoto kutoka Hospital ya Hope Dental iliyoko jijini Mwanza alizitaja baadhi ya dalili za meno ni pamoja na kupata maumivu makali ya jino hasa wakati wa usiku kupata maumivu wakati wa kula na kunywa, huku Lorna Carneiro akiwafundisha kwa vitendo wanafunzi hao jinsi ya kusafisha kinywa na meno kwa kutumia mswaki.

Veronica Marwa Mwanafunzi wa darasa la 3 shule ya msingi Maika alisema hajawahi kupiga mswaki zaidi ya kusukutua mdomo kwa maji nakwamba dawa ya meno na mswaki alivyopewa kama zawadi katika maadhimisho hayo atavitumia ili kinywa na meno kuwa safi.

Kaimu Mkurugenzi wa halmashauri ya wilaya ya Tarime ambaye pia ni Muuguzi mkuu kituo cha Afya Nyamwaga Debora Magasi alisema kuwa kufika kwa Madaktari wa meno kituoni hapo wamewawezesha wananchi kupata Elimu na huduma ya meno kwakuwa kituo hicho hakina Daktari wa meno.

Maadhimisho ya wiki ya Afya ya Kinywa na Meno Kitaifa yanafanyika wilayani Tarime ambapo kauli mbiu ya mwaka huu ni  “fikiria kinywa fikilia mwili’’