WAZIRI MKUU AIPONGEZA TARIME KWA MAPOKEZI MAZURI.

Tuma: January 21st, 2018

Waziri Mkuu Mhe. Kassim Majaliwa ameridhishwa na mapokezi ya Wananchi wa Wilaya ya Tarime kwa jinsi ambavyo wameacha shughuli zao na kujitokeza kwa wingi kumpokea.

“Nimeridhishwa na kufurahishwa sana na mapokezi ya Tarime kwasababu nimefanya ziara  Nchi zima lakini haijawahi kutokea, nimepokelewa na umati mkubwa wa Wananchi kiasi hiki huku wakiwa na tisheti zenye sura yangu nimefarijika sana” alisema Majaliwa.

Majaliwa aliwapongeza pia Watumishi wa Halmashauri ya Wilaya ya Tarime kwa kusimamia vyema utekelezaji wa miradi ya maendeleo ya Wananchi na kushauri Halmashauri zingine kuja kuiga mfano Tarime.

“Serikali imetoa shilingi milioni 500 katika ujenzi wa Kituo cha Afya Sirari lakini wao wamejenga maboma matano na yamekamilika kwa asilimia sabini kwa shilingi milioni mia moja na ishirini tu, nimeridhishwa na ujenzi huo” alisema Majaliwa.

Kwa upande wake Mkurugenzi wa Halmashauri ya Wilaya Tarime Bw. Apoo Tindwa alisema kuwa Kituo hicho kimekamilika kwa jitihada za Wananchi kujitokeza kuunga mkono serikali ambapo wadau mbalimbali wamechangia na Halmashauri kwa kutumia wataalam wake kusimamia ujenzi huo kwa asilimia 100.

Mpaka sasa wamefanikiwa kujenga jengo la maabara, Wodi ya wazazi, Chumba cha kuhifadhia maiti, nyumba ya mganga na chumba cha upasuaji (Theatre).