WAZIRI MKUU ASISITIZA ELIMU KWA MTOTO WA KIKE.

Tuma: January 19th, 2018

Waziri Mkuu wa Jamhuri ya Muungano wa Tanzania, Mhe. Kassim Majaliwa ametoa msisitizo kuhakikisha yeyote anayekatisha ndoto za mtoto wa kike kupata elimu apatiwe adhabu ya kifungo cha miaka 30 jela.

Akizungumza mara baada ya kuifungua shule ya Wasichana Borega High School iliyopo Kijiji cha Borega Wilayani Tarime, alisema katika serikali ya awamu ya tano suala la elimu kwa  mtoto wa kike limepewa umuhimu wa kipekee hivyo imekusudia kupambana na watu ambao wanakatisha ndoto za  mtoto wa kike kupata elimu wakiwemo wazazi wanaopokea mali na kuwaozesha.

Alisema wazazi wanaokaa na kushiriki vikao vya kupanga mahari za kuwaozesha wanafunzi adhabu ya miaka 30 jela pia inawahusu.

“Tunataka watoto wa kike wasome ili waje kuwa viongozi wakubwa katika taifa letu na wale watakaojaribu kuharibu ndoto zao tumetunga sheria kali za kuwashughulikia watakao husika kwa namna yoyote.” Alisema Majaliwa.

Waziri Mkuu akiwa shuleni hapo aliipongeza Halmashauri ya Wilaya ya Tarime kwa kusimamia vyema ujenzi wa majengo ya shule hiyo na kumtaka Mkurugenzi kuhakikisha gari linapatikana shuleni muda wote ili kutoa huduma kwa wanafunzi na walimu wa shule hiyo.

Akipokea maagizo hayo Mkurugenzi wa Halmashauri alisema amepokea maagizo yaliyotolewa na Waziri Mkuu na kuahidi ndani ya wiki moja gari litafika shuleni na kuanza kutoa huduma.

Waziri Mkuu wa Jamhuri ya Muungano wa Tanzania akikagua maeneo ya Shule ya wasichana Borega High School.