Wilaya Ya Tarime Yashiriki Sherehe Za Nane Nane.

Tuma: August 11th, 2017

Halmashauri ya wilaya ya Tarime imekuwa miongoni mwa halmashauri za mikoa saba ya Kanda ya Ziwa zilizoshiriki maonesho ya Sikukuu ya Wakulima (Nanenane) yaliyofanyika kwa takribani siku saba katika viwanja vya Nyamhongolo mkoani Mwanza.

Katika maonesho hayo Tarime ilizawadiwa cheti cha ushindi ambapo kwa mwaka huu yakiwa na kauli mbiu “Zalisha kwa tija mazao na bidhaa za kilimo, mifugo na uvuvi ili kufikia uchumi wa kati” kwa kushika nafasi ya Kwanza katika kipengele cha Wakulima wa Mazao na Mbogamboga ambapo Mkulima Boniphace Sagamu kutoka Tarime aliibuka mshindi wa kwanza.

Katika maonyesho hayo Wananchi walipata fursa ya kujifunza juu ya ufugaji bora wa kuku wa kisasa na wa kienyeji, ufugaji wa Nyuki pamoja na Ufugaji bora wa Ngómbe. Pia kilimo cha Mahindi, Kahawa, Ndizi pamoja na Matunda aina ya Tikiti Maji.

Aidha waliweza kupata fursa ya kujifunza suala zima la ujasiriamali kutoka katika kikundi cha wanawake (Economy Group) wanaowezeshwa na Halmashauri. Waliweza kujionea bidhaa mbalimbali zinazotengenezwa kwa mkono kama vile pochi, shanga, bangili, vikoi, sabuni na asali.

Sherehe za Nanenane katika kanda ya Ziwa ziliambatana na burudani mbalimbali ambapo mgeni rasmi alikuwa Mkuu wa Mkoa wa Simiyu, Anthony Mtaka.