ZIARA YA MKUU WA WILAYA, SHULE YA SEKONDARI MAGOTO

Tuma: June 2nd, 2025

Siku ya leo, tarehe 02/06/2025, Mkuu wa Wilaya ya Tarime Mhe. Meja Edward Flowin Gowele akiwa na Mkurugenzi Mtendaji wa Halmashauri ya Wilaya ya Tarime na wataalamu mbalimbali ametembelea Shule ya Sekondari Magoto kwa lengo la kukagua utekelezaji wa mradi wa ujenzi wa miundombinu ya shule kupitia fedha za BARRICK awamu ya pili.

Kiasi cha fedha kilichotengwa kwa ajili ya mradi huu wa miundombinu ya shule ya sekondari Magoto ni shs 431,000,000/= ambapo kiasi cha shs 260,000,000/= ni kwa ajili ya Mabweni mawili, shs 150,000,000/= ni kwa ajili ya vyumba sita vya madarasa na shs 21,000,000/=  ni kwa ajili matundu kumi ya vyoo.

Mkuu wa Shule wa Sekondari Magoto, Mwl. Kenene Christopher Mosabi ameeleza kuwa utekelezaji wa mradi huu ulianza rasmi  mnamo tarehe 20/11/2024 na mpaka sasa ujenzi wa mabweni yote mawili upo katika hatua ya awali ya msingi, vyumba vinne vya madarasa yapo katika hatua ya upauaji na ujenzi wa matundu ya vyoo kumi bado haujaanza. 

Baada ya kusikiliza taarifa  na kukagua mradi huo, Mhe. Gowele amemsisitiza Mkurugenzi na Wataalamu wote kuongeza usimamizi wa mradi huo kwani utekelezaji wake unaonyesha kuwa nyuma ya mda. Vile vile ameagiza mgodi wa BARRICK kuboresha ushirikiano mzuri wa kazi  kati yao na Uongozi wa Halmashauri ya Wilaya ya Tarime ili kuhakikisha mradi huu kuisha ndani ya mda kwa manufaa ya wanafunzi wa shule hiyo na wananchi wote kwa ujumla.