Maadhimisho ya siku ya upandaji miti Wilayani Tarime

Tuma: April 4th, 2017

HALMASHAURI YA WILAYA TARIME YAADHIMISHA SIKU YA UPANDAJI MITI

Halmashauri ya Wilaya ya Tarime Mkoani Mara imeadhimisha siku ya upandaji miti yenye kauli mbiu ‘‘Panda miti, tunza Misitu upate nishati’’ kwa kutoa Miti 1000 kwa jeshi la kujenga taifa JKT na kushirikiana kwa pamoja kuipanda katika maeneo ya wazi kwa lengo la kuboresha mazingira na kulinda mipaka ya jeshi.

Akikabidhi miti hiyo kwa Kaimu Kamanda wa kikosi cha Rwamkoma 822KJ Capt. Peter Kulyakwave, Katibu Tawala wa Wilaya ya Tarime Bw. John Marwa aliyekuwa mgeni rasmi kwenye maadhimisho hayo alisema Wilaya ya Tarime ilikuwa na mvua za kutosha kwa kuwa ilitawaliwa na miti mingi.

Katibu Tawala aliongeza kusema kadri siku zinavyozidi kwenda Wilaya ya Tarime inazidi kupoteza ukijani kutokana na Wananchi kukata Miti ovyo, hivyo aliwasii Wananchi kwa ujumla kupanda miti na kuhifadhi mazingira.

Afisa Misitu Bi. Eva Jacob kwa niaba ya Mkurugenzi Mtendaji wa Halmashauri ya Wilaya Tarime alisema kuwa Kitengo cha misitu kimekuwa na mikakati ya kuhamasisha Wananchi kuondoa Miti isiyo rafiki kwa Mazingira Mfano, Mikaratusi na badala yake ipandwe miti rafiki.

Ni vyema maeneo ya wazi yaliyopo Vijijini yakatengwa kwa ajili ya misitu ili kuongeza idadi ya Misitu katika Wilaya ya Tarime, alisema Afisa Misitu.

Mwaka 2010/2011 Halmashauri ilipanda miti 1,469,637 Mwaka 2011/2012 Miti 1,410,433 Mwaka 2012/2013 Miti 1,223,844 Mwaka 2013/2014 Miti 827,139 Mwaka 2014/2015 Miti 957,824 Mwaka 2015/2016 Miti 1,040,427 na Mwaka 2016/2017 Miti 758,210.

Kwa upande wake Kaimu Kamanda wa kikosi cha Rwamkoma aliipongeza Halmashauri hiyo kwa kuwapatia Miti ambapo aliahidi kuwa JKT wataitunza na kuilinda na kwamba wataipanda maeneo ya wazi lakini pia watazalisha vitalu vya miti.