WAKULIMA WA KAHAWA WATAKIWA KUPANDA MBEGU YA CHOTARA FUPI

Tuma: April 20th, 2018

Mkuu wa mkoa wa Mara Adam Malima amewataka wakulima wa zao la Kahawa kupanda mbegu ya Chotara fupi kwakuwa ndiyo mbegu inayozaa na kustawi zaidi ikilinganishwa na mbegu zingine zilizozoeleka kulimwa na wakulima wa Tarime.

Malima ambaye pia ni Mwenyekiti wa wanasayansi wa kilimo Nchini aliyasema hayo wakati akizungumza na wajumbe wa vyama vya wakulima wa zao la kahawa mjini Tarime, lengo la kikao ikiwa ni kufahamu changamoto za wakulima na namna ya kukuza zao hilo ili liwe na tija kwa wakulima na mkoa kwa ujumla.

Aliongeza kuwa kuwa iwapo wakulima watang’oa mbegu za zamani na kupanda upya mbegu za chotara zao hilo litaongeza thamani kutoka tani 2,000 zinazovunwa hadi tani 9,000 kwa mwaka kwakuwa mbegu ya chotara uzaa sana.

Kwa ushirikiano wa Vyama vya msingi ni matarajio yake mkoa wa Mara utaongoza kwa kuwa na uzalishaji mkubwa wa kilimo cha Kahawa chenye tija na manufaa kwa wakulima huku mbegu ya Chotara fupi ikipewa kipaumbe zaidi.

Diwani wa kata ya Muriba Michael Joseph ambaye pia ni mwanachama wa chama cha msingi cha Kahawa Bungurere alisema kuwa aliingia kwenye chama hicho tangu 1991 nakwamba mashamba yamechoka kutokana na kulimwa kwa miaka mingi hivyo kuna haja ya Serikali kuwapatia pembe jeo za kilimo.

Meneja wa Chama cha wakulima mkoani Mara (WAMACU)Jeremiah Mugendi alisema kuwa kuna vyama 17 vya ushirika kati ya hivyo 12 ni vya kahawa, Pamba 3 na Tumbaku 2 kukiwa na jumla ya wanachama 50.

Mugendi alisema kuwa msimu wa 2017/2018 WAMACU walikusanya tani 228.893 kutoka kwa wanachama wake,Kahawa ghafi Tani 228.893 zilizokobolewa na kupatikana kahawa safi kg 103,629 iliyouzwa kwa sh. 421,218,400 milioni ambayo ni sawa na 4,064.67 kwa kilo moja ya kahawa safi.

Alizitaja changamoto za uendeshaji wa shughuli kuwa ni pamoja na kukawizwa kukobolewa kwa kahawa, Uhaba wa upatkanaji wa magunia na ukosefu wa soko la uhakika.